ხვიჩა კვარაცხელიას შესახებ

ხვიჩა კვარაცხელია — ქართველი ფეხბურთელი, რომელიც 2001 წლის 12 თებერვალს თბილისში დაიბადა. დღეს იგი ითვლება ერთ-ერთ ყველაზე გამორჩეულ და წარმატებულ ფეხბურთელად როგორც საქართველოში, ასევე ევროპულ ფეხბურთში

ადრეული კარიერა

ხვიჩა ფეხბურთის თამაშს 2012 წელს თბილისის „დინამოს“ აკადემიაში შეუდგა. პროფესიონალური დებიუტი 2017 წელს, 16 წლის ასაკში, თბილისის „დინამოში“ ჰქონდა. შემდეგ ითამაშა „რუსთავში“, საიდანაც 2019 წელს იჯარით გადავიდა მოსკოვის „ლოკომოტივში“. ამავე წელს კონტრაქტი გააფორმა ყაზანის „რუბინთან“, სადაც სამი სეზონი გაატარა და ორჯერ დასახელდა რუსეთის პრემიერ ლიგის საუკეთესო ახალგაზრდა მოთამაშედ.ეროვნული ბიბლიოთეკა

2022 წელს, უკრაინაში ომის გამო, კვარაცხელიამ დატოვა რუსეთი და დაბრუნდა საქართველოში, სადაც „დინამო ბათუმში“ ითამაშა. მხოლოდ 11 მატჩში 8 გოლი გაიტანა, რის შემდეგაც მისი ტრანსფერი ევროპულ კლუბებში გახდა აქტუალური

„ნაპოლი“ და იტალიური ტრიუმფი

2022 წლის ივლისში ხვიჩა კვარაცხელია გადავიდა იტალიურ „ნაპოლიში“ დაახლოებით 10–12 მილიონ ევროდ. უკვე პირველივე სეზონში მან გუნდი 33-წლიანი პაუზის შემდეგ სერია A-ს ჩემპიონობამდე მიიყვანა. იგი გახდა ლიგის საუკეთესო ასისტენტი, დასახელდა სეზონის MVP-ად და ჩემპიონთა ლიგის საუკეთესო ახალგაზრდა მოთამაშედ. „ნაპოლიში“ მან 85 მატჩში 28 გოლი გაიტანა.

„პარი სენ-ჟერმენი“ და ახალი გამოწვევები

2025 წლის იანვარში კვარაცხელია შეუერთდა საფრანგეთის გრანდს — „პარი სენ-ჟერმენს“ 70 მილიონ ევროდ. იგი გახდა კლუბის ისტორიაში პირველი ქართველი ფეხბურთელი. PSG-ში დებიუტი 25 იანვარს ჰქონდა, ხოლო პირველი გოლი 7 თებერვალს გაიტანა. 2025 წლის მაისში მან მოიგო საფრანგეთის ლიგა 1 და საფრანგეთის თასი, რითაც გახდა პირველი ქართველი, ვინც ეს ტიტულები მოიპოვა.

ხვიჩა საქართველოს ეროვნულ ნაკრებში 2019 წლიდან თამაშობს. მან მნიშვნელოვანი როლი ითამაშა საქართველოს ისტორიაში პირველ დიდ ტურნირზე — ევრო 2024-ზე გასვლაში. მატჩში პორტუგალიის წინააღმდეგ მან გაიტანა გოლი და დაეხმარა გუნდს მერვედფინალში გასვლაში. დღეისათვის მას 41 მატჩში 18 გოლი აქვს ნაკრებში.

ხვიჩას მამა, ბადრი კვარაცხელია, თავადაც ფეხბურთელი იყო. ხვიჩა გაიზარდა თბილისში, სწავლობდა №169 საჯარო სკოლაში. 2023 წელს დაქორწინდა ნიცა ტავაძეზე, რომელიც სამედიცინო ფაკულტეტის სტუდენტია. 2024 წელს მათ შეეძინათ შვილი.

მიღწევები და ჯილდოები

საქართველოს ღირსების ორდენი: 2024

სერია A-ს ჩემპიონი: 2022–23, 2024–25

საფრანგეთის ლიგა 1-ის ჩემპიონი: 2024–25

საფრანგეთის თასის გამარჯვებული: 2024–25

სერია A-ს სეზონის MVP: 2022–23

ჩემპიონთა ლიგის საუკეთესო ახალგაზრდა მოთამაშე: 2022–23

საქართველოს წლის საუკეთესო ფეხბურთელი: 2020, 2021, 2022, 2023

თამაშის სტილი

ხვიჩა თამაშობს მარცხენა ფლანგზე, თუმცა შეუძლია მოქმედება შეტევის სხვა პოზიციებზეც. იგი გამოირჩევა ბრწყინვალე დრიბლინგით, სისწრაფით, ტექნიკითა და მოედნის ხედვით. მისი თამაშის სტილი ხშირად შედარებულია დიეგო მარადონას თამაშთან, რის გამოც მას მეტსახელად „კვარადონა“ უწოდეს.

ხვიჩა კვარაცხელია არის თანამედროვე ქართული ფეხბურთის სიმბოლო და ერთ-ერთი ყველაზე წარმატებული ქართველი სპორტსმენი, რომელიც აგრძელებს კარიერის განვითარებას ევროპულ ელიტაში.